Disputacio vini et aque, Summa recreatorum, IV. traktát,

                                  rkp. NK Praha I E 22, f. 87v-88v

   

   

   

   Ego quondam spiritu vel in carne gravi

   Raptus sum et tercium celum penetravi,

   Ubi secretissima quedam obscultavi,

   Que post in consilio fratrum revelavi.

   

   Dum sederet siquidem in excelso deus

   Et cepisset spiritus trepidare meus,

   Statim in iudicium Thetis et Lieus

   Intrant et alteruter actor est et reus.

   

   Aqua

   Thetis ab exordio multum gloriatur,

   Ego sum cui merito laus et honor datur.

   Cum sim ex quo machina mundi firmabatur,

   Et super (me) spiritus domini ferebatur.

   

   Vinum

   Bachus ad hoc talia incipit referre,

   Mos est prius vilia, cara post deferre.

   Sic et deus voluit te prius offerre,

   Et me post ut biberent potatores terre.

   

   Aqua

   Me vicis dulcissima Cristi ampliavit,

   Quando me de puteo potum postulavit.

   De torrente siquidem attestante davit,

   Bibit et tunc proprium capud exaltavit.

   

   Vinum

   Uve nil aquaticum fuit intermixtum,

   Cum in vite dominus fructum dedit istum.

   Ergo qui potaverit vinum aqua mixtum,

   Peccavit contra deum et adversus Cristum.

   

   Aqua

   Me contenta respuit Nazarenus vina,

   Cum in me reposita sit vite medicina.

   Quod ex ewangelica patet disciplina,

   Dum sanaret angelus equos in piscina.

   

   Vinum

   Te quamvis aquaticus bibat Nazarenus,

   Quantum salutifer sit effectus meus.

   Patet dum Apostolus probavit, ymmo deus,

   Qui me propter stomachum bibat Thymoteus.

   

   …….
   Aqua

   Cum tu semper causa sis intemperiei,

   Ego sum opposita tue rabiei.

   Namque sicut legitur aque, non Liei

   Impetus letificat civitatem dei.

   

   Vinum

   Tu namque vilissima funderis in planum,

   Ego vero loculum mittor in archanum.

   Tu potas in montibus pecus rusticanum,

   Sed noster letificat potus cor humanum.

   

   Aqua

   Fructum temperaneum reddit excolenti,

   Lignum quod est proximum aque defluenti.

   Par est bono nuncio longe venienti,

   Potus aque frigide viro sicienti.

   

   Vinum

   Satis contemptibilis, satis est egena,

   Si qua forte ducitur sine vino cena.

   Non exterret homines paupertatis pena,

   Cum me promptuaria sunt eorum plena.

   

   Aqua

   Primam ego fidei portam vendicavi,

   Quando dei filium in Yordane lavi.

   Et figuram veteris legis consumavi,

   Cum de suo latere foras emanavi.

   

   Vinum

   Ad baptismi graciam venit per te reus,

   per me iustos homines iungit sic dominus.

   Nec fuisse legitur aqua sed lieus,

   De quo dixit dominus hic est sangwis meus.

   

   Aqua

   Ego pulchritudinis mater, claritatis

   Mater sum et omnibus offero me gratis.

   Ego pratis aufero pestem siccitatis,

   Cum super intonuit deus maiestatis.

   

   Vinum

   Quantumcumque sapiens et quantumcumque carus,

   Sine vini tramite cibus fit amarus.

   Quo gaudet poculo pauper et avarus,

   Sed calix inebrians o quam est preclarus.

   

   Aqua

   Ego flammas tempero solis, in pruinis

   Potum do volucribus, opus molendinis.

   Et mundum circumeo fluctibus marinis,

   Ubi sunt reptilia, quorum non est finis.

   

   Vinum

   Ego in palmitibus in torcula ivi

   Et exinde hominis ventrem introivi.

   Vasculorum genera multa pertransivi

   Et in potatoribus requiem quesivi.

   

   Aqua

   Racio confunditur, oculi cecantur

   Hiis, qui tuis potibus nimis inmorantur.

   Blande dum ingrederis, potantes turbantur

   Et, quod est deterius, mox inebriantur.

   

   Vinum

   Potus tuus pestifer est et venenatus,

   Ni foret prophetico sale decoratus.

   In me tuus pestifer potus est mutatus,

   Cum fuit ad nupcias Cristus invitatus.

   

   …..

   

   Aqua

   Dextro templi latere meus est egressus,

   Per me culpa luitur, si est quis excessus.

   Actus elemosine mistice concessus

   Est mihi, quo criminum ignis est opressus.

   

   Vinum

   Virtus ista siquidem in te figuratur,

   Sed per me conpunccio cordis designatur,

   Quo deus virgineus pudor germinatur,

   Dum reus convertitur et iustificatur.

   

   Aqua

   Si quis falsos hactenus coluere deos,

   Si renasci faciat se per fontes meos,

   Rex in celo recipit absolvendo reos,

   Nec qui in celis habitat irridebit eos.

   

   Vinum

   Viam celi dare est actuum meorum,

   Nam non longe graciam petas extrorum.

   Per me tu intrabis atria celorum,

   Ubi collocate sunt anime iustorum.

   

   Aqua

   Hanc ad vocem civibus celi concitatis,

   Quasi racionibus vini conprobatis,

   Inclamatur forcius vocibus elatis,

   Terre pax hominibus bone voluntatis.

   

   Vinum

   Quibus ego vocibus tale post examen

   Excitatus expuli sompnii velamen

   Et laudavi concinnens patrem, natum, flamen

   Usque ad in gloriam dei patris amen.