SU GERÙNDIU
Su gerùndiu est unu tempus verbale chi in sardu si format, francu casos ispetzìficos,
in sa manera chi sighit: raighina + ende
Su gerùndiu serbit a indicare chi s'atzione galu sighit est a nàrrere chi su sugetu est
faghende galu sa matessi atzione.
Cust'atzione podet èssere a su presente comente a su passadu:
presente: Pedru est mandighende
passadu: Pedru fiat mandighende
Si pensamus a s'atzione de lèghere unu libru, podimus cunsiderare chi:
- su sugetu sighit leghende
- su sugetu at cumpridu de lèghere
cumpara su gerùndiu cun su partitzìpiu passadu:
a) Pedru est leghende su libru
b) Pedru at lèghidu su libru
in sa frase (a) Pedru NO at cumpridu de lèghere su libru ca s'atzione sighit, mentres
in s'atzione (b) Pedru at cumpridu de lèghere.
B'at duos tempos de su gerùndiu
presente e passadu
presente: andende (andare)
es: so andende a domo
passadu: apende (àere) naradu (nàrrere) [gerùndiu + partitzìpiu passadu]
es: Giùliu si nch'est andadu apende naradu a Pedru su chi pensaiat.
In sos verbos irregulares, ue sa prima persone presente cumprit in -àrgio -èrgio, su
gerùndiu càmbiat sa forma e si basat subra verbu a sa prima persone:
(mòrrere) > (mòrgio) > (morgende)
S'ausiliare est su verbu èssere
es: est andende / est coghende / est mandighende / est amende ...
In atziones subordinadas si podet resùmere gasi:
temporale: un'atzione si subòrdinat a livellu temporale cun sa printzipale e podet
èssere anteriore, simultànea e posteriore.
Anteriore: sa pitzinna, apende contadu su dinare chi teniat, est andada a comporare su
pane.
Simultànea: andende a butega s'est abbista chi non teniat su dinare pro su pane.
Causale: ispricat su pro ite? (s'atzione de su gerùndiu funtzionat comente
cumplementu tzircustantziale de causa)
Es: apo ischidu cosas interessantes de Giuanne faeddende diretamente cun sa famìlia
sua
Modale: sa segunda atzione currispondet a su cumplementu tzircustantziale de modu
(comente?)
Es: so resessidu a essire dae sa vetura seghende totu sos bidros
In limba inglesa esistit su gerùndiu chi a bortas currispondet a su sardu:
es: I'm reading a book / so leghende unu libru
es: I was thinking about you / fia pensende in tegus
comente avèrbiu:
es: I spent the day reading / apo passadu (tota) sa die leghende
a bortas no est gasi ca si tratat de su gerùndiu chi funtzionat comente sugetu:
es: running is good for your health / cùrrere faghet bene a sa salude
non s'impreat pro su tempus benidore!
Es: We are leaving Sardinia on Monday / Nos ch'andamus lunis dae sa Sardigna.