Einhardi Vita Karoli Magni. Edd. G. H. Pertz-G. Waitz. MGH SRG 25. Hannover, 1911,

s. 32 (kapitola 27-28).


27

Colebat prae ceteris sacris et venerabilis locis apud Romam ecclesiam beati Petri apostoli; in
cuius donaria magna vis pecuniae tam in auro quam in argento necnon et gemmis ab illo congesta est.
Multa et innumera pontificibus munera missa. Neque ille toto regni sui tempore quicquam duxit
antiquius, quam ut urbs Roma sua opera suoque labore vetere polleret auctoritate, et ecclesia
sancti Petri per illum non solum tuta ac defensa, sed etiam suis opibus prae omnibus ecclesiis
esset ornata atque ditata. Quam cum tanti penderet, tamen intra XLVII annorum, quibus regnaverat,
spatium quater tantum illo votorum solvendorum ac supplicandi causa profectus est.

28

Ultimi adventus sui non solum hae fuere causae, verum etiam quod Romani Leonem pontificem multis
affectum iniuriis, erutis scilicet oculis linguaque amputata, fidem regis implorare conpulerunt.
Idcirco Romam veniens propter reparandum, qui nimis conturbatus erat, ecclesiae statum ibi totum
hiemis tempus extraxit. Quo tempore imperatoris et augusti nomen accepit. Quod primo in tantum
aversatus est, ut adfirmaret se eo die, quamvis praecipua festivitas esset, ecclesiam non
intraturum, si pontificis consilium praescire potuisset. Invidiam tamen suscepti nominis, Romanis
imperatoribus super hoc indignantibus, magna tulit patientia. Vicitque eorum contumaciam
magnanimitate, qua eis procul dubio longe praestantior erat, mittendo ad eos crebras legationes et
in epistolis fratres eos appelando.




Překlad:

Einhardus, …a neuniknout budoucímu věku. Vita Caroli Magni, život a doba Karla Velikého. Přeložil
P. Daniš. Set Out Praha 1999.